[]
منڈلا: مدھیہ پردیش میں آئندہ اسمبلی انتخابات سے قبل مرکزی وزیر داخلہ اور تعاون امیت شاہ نے آج ریاست کے قبائلی اکثریتی منڈلا ضلع سے اس طبقہ سے اپیل کرتے ہوئے کہا کہ قبائلی برادری یہ طے کرے کہ انہیں اقلیتوں کی خوشنودی کرنے والی کانگریس کی حکومت چاہیے یا قبائلیوں کی ترقی اور عزت کو ترجیح دینے والی بھارتیہ جنتا پارٹی کی حکومت چاہیے۔
امیت شاہ یہاں بی جے پی کی جن آشیرواد یاترا کو جھنڈی دکھانے آئے تھے۔ اس دوران ریاست کے وزیر اعلیٰ شیوراج سنگھ چوہان، پارٹی کی ریاستی یونٹ کے صدر وشنودت شرما، ریاستی الیکشن انچارج اور مرکزی وزیر بھوپیندر یادو، مرکزی وزیر فگن سنگھ کلستے اور ریاستی حکومت کے کئی وزراء اور بی جے پی لیڈر موجود تھے۔
اس دوران شاہ نے اپنے خطاب کا آغاز ماں نرمدا اور قبائلی رہنماؤں رگھوناتھ اور شنکر شاہ کا ذکر کرتے ہوئے کیا۔ انہوں نے کہا کہ گجرات میں ماں نرمدا کے بغیر زندگی کا تصور نہیں کیا جا سکتا۔ رگھوناتھ اور شنکر شاہ کی قربانی پورے ملک کے لیے مشعل راہ ہے۔
انہوں نے کہا کہ مرکز میں سابقہ یو پی اے حکومت کے دوران اس وقت کے وزیر اعظم منموہن سنگھ نے یہ بیان دیا تھا کہ ملک کے خزانے پر اقلیتوں کا پہلا حق ہے۔
کانگریس حکومت خوشامد میں مگن رہی۔ سال 2014 میں نریندر مودی وزیر اعظم کے طور پر آئے۔ اپنے پہلے خطاب میں انہوں نے کہا کہ ان کی حکومت قبائلیوں اور غریبوں کی ہے۔
اس کے ساتھ ہی شاہ نے قبائلیوں سے اپیل کرتے ہوئے کہا کہ آپ کو ان دو نظریات میں سے انتخاب کرنا ہوگا۔ کانگریس کہہ رہی ہے کہ ملک کے وسائل پر پہلا حق اقلیتوں کا ہے، وہیں مسٹر مودی کہہ رہے ہیں کہ یہ قبائلیوں اور غریبوں کا ہے۔
شاہ نے کہا کہ وزیر اعظم مودی نے نو برسوں میں بہت سی تبدیلیاں کی ہیں۔ کانگریس پانی، جنگل اور زمین کے تحفظ کی بات کرتی رہی، جب کہ مودی نے پانی، جنگل اور زمین کے ساتھ قبائلیوں کی ترقی کو بھی جوڑا۔
انہوں نے 23 چھوٹی ہوئی ذاتوں کو قبائلی ذاتوں میں شامل کیا۔ برسا منڈا جینتی شروع ہوئی۔پورے ملک میں 10 مقامات پر قبائلی رہنماؤں کے میوزیم بنائے گئے۔ ملک میں پہلی بار ایک قبائلی خاتون صدر کے عہدے تک پہنچی۔
انہوں نے کہا کہ بی جے پی کی حکومتیں دیہی غریبوں، خواتین اور بیٹیوں کی بہتری کی حکومتیں ہیں۔ ایسی حکومتیں ہیں جو ہندوستان کی شبیہ بہتر کرتی ہیں۔ پہلے دہشت گرد ملک پر حملے کرتے رہتے تھے، لیکن کانگریس نے اس کی پرواہ نہیں کی۔
اڑی اور پلوامہ حملے کے بعد ہندستان نے دہشت گردوں کا خاتمہ کیا۔ مسٹر مودی نے پوری دنیا کو یہ پیغام دیا ہے کہ ہندوستان کی سرحد کے ساتھ چھیڑ چھاڑ نہیں کرنی ہے۔
