اپنے معصوم بیٹے کے قتل کے جرم میں اڈیشہ میں قاتل ماں کو عمر قید

اڈیشہ کے گنجم ضلع کی ایک عدالت نے منگل کو ایک 38 سالہ خاتون کو اپنے بیٹے کے قتل کے جرم میں عمر قید کی سزا سنائی۔ ڈسٹرکٹ اینڈ سیشن جج روپاشری چودھری نے 15 گواہوں کے بیانات ریکارڈ کرنے اور متعلقہ شواہد کی تصدیق کے بعد سزا کا اعلان کیا۔ اپنے ہی بیٹے کے قتل کی قصوروار پائی جانے والی خاتون کی شناخت بیجی پور کی رہنے والی ایس گنگا سما کے طور پر کی گئی ہے۔

سرکاری وکیل ترلوچن پریدا نے کہا کہ قتل کا یہ واقعہ 27 اکتوبر 2023 کو پیش آیا۔ ایس گنگا سما اور ان کے شوہر ایس پپا راؤ کے درمیان جھگڑا چل رہا تھا۔ اس کا آٹھ سالہ بیٹا ایس روہت کمار ٹیوشن سے واپس آرہا تھا۔ اسی وقت خاتون نے اپنے بیٹے کو تالاب میں دھکیل دیا۔ بچے کی چیخ سن کر وہاں پہنچنے والے لوگوں نے اسے کسی طرح تالاب سے باہر نکالا۔ اس کے بعد اسے مقامی اسپتال لے جایا گیا۔ لیکن تب تک بچہ مر چکا تھا۔

ملزم خاتون کے شوہر کی شکایت کی بنیاد پر برہم پور ٹاؤن پولیس اسٹیشن میں تعزیرات ہند کی متعلقہ دفعات کے تحت مقدمہ درج کیا گیا تھا۔ پولیس نے دوران تفتیش خاتون کو حراست میں لے لیا۔ دوران تفتیش اس نے اپنے جرائم کا اعتراف کر لیا۔ تب سے وہ جیل میں ہے۔