واشنگٹن: امریکی صدر ڈونلڈ ٹرمپ کی تقریب میں پہلی بار اذان کی آواز گونجی قرآن پاک کی تلاوت کے ذریعے دین اسلام کی تبلیغ کی گئی۔
ڈونلڈ ٹرمپ نے گزشتہ پیر کو امریکا کے 47 ویں صدر کے عہدے کا حلف اٹھایا۔ اس حلف برداری کے ایک دعائیہ تقریب منعقد ہوئی جس میں پہلی بعد تمام مذاہب کے پیشواؤں نے شرکت کی۔
غیر ملکی میڈیا کے مطابق واشنگٹن کے نیشنل کیتھیڈرل چرچ میں ہونے والی اس دعائیہ تقریب میں مسلمانوں کی نمائندگی امریکا کی دی نیشنز مسجد کے امام ڈاکٹر محمد فراسر رحیم نے کی۔
اس تقریب میں پہلی بار اذان کی آواز گونجی اور قرآن پاک کی تلاوت کی گئی۔
ڈاکٹر محمد فراسر نے پہلے قرآن پاک کی سورۃ حدید کی آیت نمبر 4 سے 7 تک تلاوت کی اور اس کے بعد اذان دے کر اللہ تعالیٰ کی کبریائی بیان کی۔
قرآن پاک کی تلاوت کردہ ان آیات میں اللہ رب العالمین کی قدرتِ کمال اور کامل اختیار کے ساتھ ساتھ زمین اور آسمان کے بننے کے عمل کو بیان کیا گیا ہے۔
اس کے ساتھ ہی ان آیات میں دین اسلام میں داخل ہونے کی ہدایت کرتے ہوئے کہا گیا ہے کہ اللہ اور اس کے رسول ﷺ پر ایمان لاؤ۔
تلاوت کی گئی آیات کا ترجمہ یہ ہے۔
’’وہی ہے جس نے آسمانوں اور زمین کو چھ دن میں بنایا پھر وہ عرش پر قائم ہوا، وہ جانتا ہے جو چیز زمین میں داخل ہوتی ہے اور جو اس سے نکلتی ہے اور جو آسمان سے اترتی ہے اور جو اس میں اوپر چڑھتی ہے، اور وہ تمہارے ساتھ ہے جہاں کہیں تم ہو، اور اللہ اس کو جو تم کرتے ہو دیکھتا ہے۔
آسمانوں اور زمین کی حکومت اسی کے لیے ہے، اور سب امور اللہ ہی کی طرف لوٹائے جاتے ہیں۔ وہ رات کو دن میں داخل کرتا ہے اور دن کو رات میں داخل کرتا ہے، اور وہ سینوں کے بھید خوب جانتا ہے۔
اللہ اور اس کے رسول پر ایمان لاؤ اور اس میں سے خرچ کرو جس میں اس نے تمہیں پہلوں کا جانشین بنایا ہے، پس جو لوگ تم میں سے ایمان لائے اور انہوں نے خرچ کیا ان کے لیے بڑا اجر ہے۔‘‘
اس موقع پر ٹرمپ سمیت تمام شرکا نے خاموشی اور احترام کے ساتھ تلاوتِ قرآن پاک اور اذان کو سماعت کیا۔
ہمیں فالو کریں
