دہلی اسمبلی انتخاب: کانگریس کی انتخابی مہم کا راہل گاندھی آج کریں گے آغاز، سیلم پور کی ریلی پر سبھی کی نظر

کانگریس کے قد آور رہنما اور لوک سبھا میں اپوزیشن لیڈر راہل گاندھی پیر کو مشرقی دہلی کے سیلم پور علاقے میں عوامی جلسہ سے خطاب کرکے کانگریس کی انتخابی مہم کی شروعات کریں گے۔ راہل کی دہلی اسمبلی انتخابات کی مہم میں ہو رہی اینٹری پر ریاستی کانگریس ہی نہیں سبھی سیاسی پارٹیوں اور سیاسی ماہرین کی گہری نظر ہے۔ دہلی اسمبلی انتخاب میں کانگریس کے اب تک کے جارحانہ تیور کو پارٹی قیادت نے اگلے پائیدان پر لے جانے کا جذبہ دکھایا تو یہ انتخاب بے حد دلچسپ موڑ لے سکتا ہے۔ دہلی میں کانگریس کے انتخابی امکانات کے پیش نظر راہل کا سیلم پور میں ہونے والا پہلا عوامی جلسہ کافی اہم مانا جا رہا ہے۔

کانگریس مکر سنکرانتی سے ایک دن قبل دہلی اسمبلی انتخابات کے لیے اپنی تشہیری مہم شروع کرنے جا رہی ہے، جس کا بگل راہل گاندھی پھونکیں گے۔ اس کے بعد پرینکا گاندھی، ملکارجن کھڑگے اور دیگر قد آور رہنما میدان میں اتریں گے اور پارٹی کے عزائم کو عوام تک پہنچانے کی کوشش کریں گے۔ عام آدمی پارٹی کی حکومت اور اس کی قیادت پر راہل گاندھی کا کیا رخ ہوتا ہے، اس پر سبھی کی نظریں ٹکی ہوئی ہیں۔ راہل کا پہلا عوامی جلسہ اس علاقے میں رکھا گیا ہے جہاں پر کانگریس کی مضبوط سیاسی بنیاد ہے اور انتخابی مقابلہ سیدھے عآپ کے امیدوار سے ہے۔ ایسے میں دہلی کے کانگریسی رہنماؤں کو امید ہے کہ راہل گاندھی اپنے پہلے عوامی جلسہ میں اروند کیجریوال اور ان کی پارٹی کی 10 سال کی حکومت کی ناکامیوں کو لے کر جارحانہ رخ اپنائیں گے۔

راہل گاندھی کی تشہیری مہم کی حکمت عملی اور حصہ داری کا دہلی اسمبلی انتخابات میں فیصلہ کن کردار ثابت ہو سکتا ہے۔ حالانکہ کانگریس دہلی اسمبلی انتخابات میں بھلے بی جے پی اور عام آدمی پارٹی دونوں کے خلاف لڑ رہی ہے، لیکن اقتدار پر کیجریوال کی پارٹی کا قبضہ ہے اس لیے دہلی کانگریس کے رہنماؤں اور پارٹی کے انتخابی حکمت عملی ساز کا کہنا ہے کہ راہل گاندھی نہ صرف بی جے پی بلکہ عام آدمی پارٹی کی 10 سال کی ناکامیوں پر حملہ کرنے میں کوئی رعایت برتنے والے نہیں ہیں۔