حیدرآباد: گوا کے ساحل پر حالت نشہ میں ہوئے جھگڑے میں آندھراپردیش کا ایک شخص ہلاک ہوگیا۔
شمالی گووا کے کلنگوٹ علاقہ میں پیش آئے اس واقعہ کے سلسلے میں پولیس نے 23 سالہ شخص کو گرفتار کر لیا۔
ایک سینئر پولیس عہدیدارنے بتایا کہ نشہ میں دھت سیاحوں کے ایک گروپ نے وہاں لگائی گئی جھونپڑی میں داخل ہوکر کھانے کا مطالبہ کیا، حالانکہ مالک نے انہیں باورچی خانے کے بند ہونے کے بارے میں مطلع کر دیا تھا۔
اس دوران، سیاحوں میں سے ایک نے جھونپڑی میں کام کرنے والی خاتون کے خلاف نازیبا زبان استعمال کی، جس پر جھگڑا بڑھ کر مار پیٹ میں بدل گیا۔
جھونپڑی کے ایک ملازم نے مبینہ طور پر ڈنڈے سے روی تیجا نامی سیاح کے سر پر حملہ کیا، جس پر وہ موقع پر ہی ہلاک ہو گیا۔
پولیس نے نیپال سے تعلق رکھنے والے جھونپڑی کے ملازم کمل سونار کو گرفتار کر لیا اور مزید دو افراد، جن میں جھونپڑی کا مالک بھی شامل ہے، کی تلاش جاری ہے۔ پولیس نے ملزم کے خلاف قتل کا مقدمہ درج کر لیا ہے۔
ہمیں فالو کریں
