میڈیا کی ذمہ داری عوامی مفاد پر مبنی رپورٹنگ کرنا ہے،کے سرینواس ریڈی۔
حیدرآباد۔20نومبر(سفیرنیوز/صدائے حسینی)تلنگانہ میڈیا اکیڈمی کے چیئرمین کے سرینواس ریڈی نے کہا کہ میڈیا کو محض سنسنی خیز کے بجائے عوامی مفادات کو فروغ دینے والی رپورٹنگ کے ذریعے اپنی ذمہ داری نبھانی چاہیے۔آج یادادری بھونگیری ضلع کے چوٹوپل میں ایس ایم آر فنکشن ہال میں منعقدہ ٹی ڈبلیو جے(TWJ) چوٹوپل شاخ کے اجلاس میں شرکت کرتے ہوئے اپنے خطاب میں انہوں نے کہا کہ میڈیا کو عوام کی آواز بن کر آزادانہ طور پر اپنی ذمہ داری نبھانے کی وجہ سے ہی اسے “چوتھے ستون” کے طور پر جانا جاتا ہے۔ تاہم ماضی میں میڈیا نے جو سماجی فلاحی کردار ادا کیا اس میں اور موجودہ دور کے کردار میں بہت فرق ہے۔ انہوں نے کہا کہ اگر میڈیا کو تجارتی زاویے سے چلایا جائے تو یہ عوام کی توقعات کے مطابق سماج کی بھلائی کے لیے کام نہیں کر سکتا۔سرینواس ریڈی نے مزید کہا کہ اظہار رائے کی آزادی میں سوشل میڈیا کا فروغ ایک مثبت پہلو ہے لیکن اس آزادی کا ذاتی مفادات کے لیے غلط استعمال ناقابل برداشت ہے۔ انہوں نے یقین دہانی کرائی کہ ریاست میں صحافیوں کی فلاح و بہبود کے لیے میڈیا اکیڈمی اپنی جانب سے کوششیں کر رہی ہے خاص طور پر صحافیوں کے لیے صحت کی اسکیم، رہائشی پلاٹس، اور مکانات کی فراہمی کے حوالے سے۔تلنگانہ اسٹیٹ ورکنگ جرنلسٹس یونین (ٹی ڈبلیو جے) کے صدر کے وراحت علی نے کہا کہ ان کی یونین متحدہ ریاست میں اور موجودہ تلنگانہ ریاست میں صحافیوں کی آواز بن کر کام کرنے والی واحد تنظیم ہے۔ انہوں نے مزید کہا کہ پچھلے پچاس سالوں سے صحافیوں کی جدوجہد میں فعال کردار ادا کرنے والے سرینواس ریڈی کا بطور میڈیا اکیڈمی چیئرمین تقرر میڈیا کے لیے ایک خوش آئند قدم ہے۔اجلاس میں یونین کے ضلعی صدر و سکریٹری ایم بی نرسملو، کروناکر، الیکٹرانک میڈیا کے ضلعی صدر ملیشم، صحافیوں کی صحت کمیٹی کے رکن جہانگیر، نیشنل کونسل کے رکن اے اندرا ریڈی اور ضلعی نائب صدر رام ریڈی سمیت دیگر افراد نے شرکت کی۔
