[]
وارانسی: وزیر اعظم نریندر مودی اترپردیش میں اپنے حلقہ کے دو روزہ دورہ کے موقع پر اہم بی جے پی ورکرس کے ساتھ ٹفن میٹنگ منعقد کریں گے۔ اس کا آغاز 7 جولائی سے ہوگا۔
توقع ہے کہ تقریباً 50 ہزار افراد اس میٹنگ میں شرکت کریں گے۔ یوپی بی جے پی کے جنرل سکریٹری (تنظیمی) دھرم پال سنگھ نے بی جے پی کارکنوں کو بتایا کہ یہ ہماری ذمہ داری ہے کہ وزیر اعظم کا شاندار اور غیرمعمولی استقبال کریں۔اس میں کوئی کوتاہی نہیں ہونی چاہیے۔
اسی دوران ضلع انتظامیہ نے حکم دیا ہے کہ وزیر اعظم کی پبلک میٹنگ میں کسی بھی الیکٹرانک چینل کی گاڑی کو آنے کی اجازت نہیں دی جائے گی۔
اس کے علاوہ پروگرام کے مقام کو نو فلائی زون قرار دیا گیا ہے۔ اس مقام پر ڈرونس کے استعمال پر پابندی لگا دی گئی ہے۔ خلاف ورزی کرنے والوں پر کڑی کارروائی کی جائے گی۔
ضلع انتظامیہ نے اپنے ایک صحافتی بیان میں یہ بات بتائی۔
کاشی ریجن کے بی جے پی صدر دلیپ سنگھ پٹیل نے کہا کہ بی جے پی کارکنوں کو چاہیے کہ وہ مودی کی میٹنگ میں کثیر تعداد میں شرکت کریں۔ بی جے پی کارکن 5 اور 6 جولائی کو وارانسی میں صفائی مہم میں حصہ لیں گے۔
