[]
’بھارت جوڑو نیائے یاترا‘ کے تعلق سے بات کرتے ہوئے جئے رام رمیش نے کہا کہ کسی بھی دھمکی سے ڈر کر ہم پیچھے نہیں ہٹیں گے، ہم ڈرنے والے نہیں ہیں۔ کانگریس لیڈر نے کہا کہ ’’راہل جی نے بار بار کہا ہے، میں ایک بار پھر اس کو دہراؤں گا کیونکہ یہی حقیقت ہے۔ جو لوگ دھمکی دیتے ہیں وہ ڈرے ہوئے ہیں۔ نریندر مودی اور امت شاہ ڈرے ہوئے ہیں۔ آج آپ نے اخبارات میں پڑھا ہوگا کہ جو نوجوان قوانین کی خلاف ورزی کر کے لوک سبھا میں داخل ہوئے تھے، انھوں نے عدالت میں ایک بیان دیا ہے۔ بیان کے مطابق انھیں مجبوراً کہنا پڑ رہا ہے کہ اس حادثہ میں اپوزیشن پارٹیوں کا ہاتھ تھا۔ وہ (ملزمین) گھبرائے ہوئے ہیں، ڈرے ہوئے ہیں، پریشانی میں ہیں۔ لیکن ہم پیچھے نہیں ہٹیں گے، بھارت جوڑو نیائے یاترا چلتی رہے گی۔‘‘
