بڑھ رہا کورونا کا خوف، ریاستیں الرٹ، ایمس دہلی میں کورونا مریضوں کے لیے خاص انتظام

ہندوستان میں گزشتہ کچھ دنوں سے کووڈ کے کیسز لگاتار بڑھ رہے ہیں۔ روزانہ 100 سے زائد نئے معاملے درج کیے جا رہے ہیں جس کی وجہ سے فعال کیسز کی تعداد تقریباً 4200 تک پہنچ گئی ہے۔ کورونا کے بڑھتے معاملوں کو دیکھ کر سبھی ریاستیں الرٹ پر ہیں۔ کووڈ کی علامت والے مریضوں کی جانچ بڑھا دی گئی ہے اور اسپتالوں میں مریضوں کے لیے خاص انتظام بھی کیا جا رہا ہے۔ اسی ضمن میں ایمس دہلی نے بھی بڑا قدم اٹھاتے ہوئے کورونا مریضوں کے لیے خاص انتظام کیا ہے۔

ایمس انتظامیہ کی طرف سے جاری حکم میں کہا گیا ہے کہ ایمس کے سی 6 بلاک (ایمرجنسی بلاک) میں کووڈ کے سنگین مریضوں کے لیے خاص انتظام کیا گیا ہے۔ اس کے لیے اس وارڈ میں کووڈ مریضوں کے لیے کیوبیکل بنائے جائیں گے۔ اگر کووڈ کا کوئی سنگین مریض ایمس میں آتا ہے تو ان میں اس کا علاج کیا جائے گا۔ ڈاکٹروں کی ایک ٹیم مریضوں کے علاج کے لیے یہاں تعینات رہے گی۔ کیوبیکل میں مریضوں کے لیے بستر سے لے کر آکسیجن اور ایمرجنسی کی سبھی سروسز ہوں گی۔ ایمرجنسی میں موجود ڈیوٹی افسر یہ یقینی بنائیں گے کہ سی 6 وارڈ میں آئے ہوئے کووڈ مریضوں کو وقت پر علاج ملے۔ اس کے لیے اسپتال انتظامیہ کی طرف سے ایک تحریری حکم سبھی محکموں کو بھی دے دیا گیا ہے۔

قابل ذکر ہے کہ کووڈ کے بڑھتے معاملوں کو دیکھتے ہوئے ایمس میں کووڈ مریضوں کی جانچ بھی بڑھا دی گئی ہے۔ کسی مریض کی سرجری یا دیگر کسی آپریشن سے پہلے کووڈ جانچ کی جا رہی ہے۔ حالانکہ ابھی اسپتال میں کووڈ کے سنگین مریض نہیں آ رہے ہیں، لیکن مستقبل میں کسی خطرے کے اندیشہ کو دیکھتے ہوئے ایمس انتظامیہ نے یہ فیصلہ لیا ہے۔