بی جے پی نے مہوا موئترا کو پارلیمنٹ سے معطل کرنے کی سازش تیار کی: ممتا بنرجی

مغربی بنگال کی وزیر اعلیٰ ممتا بنرجی نے مرکز کی مودی حکومت پر جمعرات کو سخت حملے کیے۔ انھوں نے کئی ایشوز پر مودی حکومت کو گھیرتے ہوئے کہا کہ مہوا موئترا کو لوک سبھا سے معطل کرنے کا منصوبہ بنایا جا رہا ہے۔ ساتھ ہی انھوں کرکٹ عالمی کپ فائنل مقابلہ کا تذکرہ کرتے ہوئے کہا کہ ’’ہندوستانی کرکٹ ٹیم نے علامی کپ میں ’گنہگاروں‘ کی موجودگی والے میچ کو چھوڑ کر سبھی میچ جیتے۔ اگر عالمی کپ فائنل کولکاتا یا ممبئی میں ہوتا تو ہندوستان فتحیاب ہوتا۔‘‘ انھوں نے مزید کہا کہ ’’ہندوستانیوں کھلاڑیوں نے مخالفت کی، اس لیے ہندوستانی ٹیم کو میچ کے دوران بھگوا جرسی نہیں پہننی پڑی۔‘‘

ممتا بنرجی نے مرکز میں مودی حکومت کے بہت کم دن ہونے کی پیشین گوئی بھی کی۔ انھوں نے کہا کہ مرکز میں بی جے پی کے دن مکمل ہو گئے ہیں۔ بس تین مہینے ہی مرکز میں مودی حکومت رہنے والی ہے۔ انھوں نے مرکزی حکومت کی خامیوں کو شمار کراتے ہوئے کہا کہ ملک کا بینکنگ سیکٹر بحران کی زد میں ہے۔ لگاتار پی ایس یو فروخت کیے جا رہے ہیں۔ ملک کی معیشت چوپٹ ہو چکی ہے۔ وہ مزید کہتی ہیں کہ ’’سبھی بڑی آئی ٹی کمپنیاں کولکاتا کی سلیکان ویلی منصوبہ میں سرمایہ کاری کر رہی ہیں۔‘‘

مودی حکومت کو تنقید کا نشانہ بناتے ہوئے ترنمول کانگریس چیف ممتا بنرجی واضح لفظوں میں کہتی ہیں کہ ’’بی جے پی کی عادت ہو گئی ہے بدزبانی کرنے کی۔ وہ ان سبھی لوگوں کو بدنام کرنے کا کام کرتے ہیں جن سے انھیں خطرہ نظر آتا ہے۔ صرف بڑی بڑی باتیں کرنے سے کچھ نہیں ہوتا۔ ایک طرف بی جے پی اپنی کامیابی کا ڈھول پیٹ رہی ہے، تو دوسری طرف زمین پر لوگوں کو طرح طرح کے مسائل کا سامنا کرنا پڑ رہا ہے۔ حالانکہ مودی حکومت کو ان مسائل سے کوئی مطلب نہیں۔‘‘