کریم نگر: ریاست تلنگانہ کریم نگر ضلع کے گٹو بوتکور گاؤں میں آدھی رات کو ایک ریچھ کے داخل ہونے سے مقامی افراد میں خوف و ہراس پھیل گیا۔ گنیش نگر علاقے میں ریچھ کو دیکھتے ہی مقامی لوگ خوف کے مارے چیخنے لگے جس کے
بعد ریچھ وہاں سے بھاگ گیا۔تاہم گاؤں میں ریچھوں کا داخل ہونا کوئی نئی بات نہیں ہے۔ اس سے قبل بھی کئی مرتبہ ریچھ گاؤں میں گھومتے ہوئے دیکھے جا چکے ہیں۔ دیہاتیوں کا کہنا ہے کہ علاقے میں گرینائٹ کانوں کی وجہ سے ریچھ
اپنے قدرتی مسکن سے محروم ہو رہے ہیں جس کے باعث وہ اکثر آبادی والے علاقوں کا رخ کر رہے ہیں۔گاؤں والوں نے محکمہ جنگلات کے حکام سے مطالبہ کیا ہے کہ وہ فوری اقدامات کریں تاکہ لوگوں کو اس خطرے سے محفوظ رکھا جا
سکے۔اس دوران گاؤں میں ریچھ کی موجودگی کی ایک ویڈیو سوشل میڈیا پر تیزی سے وائرل ہو رہی ہے۔ ویڈیو میں ریچھ کو ایک مقامی کتے پر حملہ کرنے کی کوشش کرتے ہوئے بھی دیکھا جا سکتا ہے۔ویڈیو وائرل ہونے کے بعد مقامی افراد
سوشل میڈیا اور واٹس ایپ گروپس میں محکمہ جنگلات کے حکام کو ٹیگ کرتے ہوئے مطالبہ کر رہے ہیں کہ ریچھ کو دوبارہ گاؤں میں داخل ہونے سے روکنے کے لیے مؤثر اقدامات کیے جائیں۔
