ترواننت پورم میں کیرالہ اسمبلی کے اجلاس کے دوران میڈیا سے گفتگو کرتے ہوئے پنرائی وجین نے کہا کہ ای ڈی اب ایک غیر جانبدار تفتیشی ادارہ نہیں رہی بلکہ اسے سیاسی مخالفین کے خلاف ہتھیار کے طور پر استعمال کیا جا رہا ہے۔ ان کا کہنا تھا کہ ملک میں ایسی ریاستی حکومتوں اور سیاسی جماعتوں پر زیادہ دباؤ ڈالا جا رہا ہے جو بی جے پی کے زیر قیادت مرکزی حکومت سے سیاسی اختلاف رکھتی ہیں۔
وجین نے کہا کہ غیر بی جے پی حکومتوں کے خلاف کارروائیاں مسلسل بڑھ رہی ہیں اور مرکزی ایجنسیاں سیاسی دباؤ کے ایک ذریعہ کے طور پر استعمال ہو رہی ہیں۔ انہوں نے اس صورتحال کو جمہوری اقدار اور سیاسی روایات کے لیے نقصان دہ قرار دیا۔
