نئی دہلی: جین مذہب کے 24ویں تیرتھنکر بھگوان مہاویر کی جینتی کے موقع پر کانگریس قیادت، ملکارجن کھڑگے، راہل گاندھی اور پرینکا گاندھی نے عدم تشدد، سچائی اور ہمدردی کے پیغام کو اجاگر کرتے ہوئے انہیں آج کے دور کے لیے نہایت اہم قرار دیا۔ رہنماؤں نے اس موقع پر عوام کو مبارکباد پیش کی اور بھگوان مہاویر کی تعلیمات کو انسانی فلاح کا راستہ بتایا۔
کانگریس صدر ملکارجن کھڑگے نے اپنے پیغام میں کہا کہ مہاویر جینتی کے اس مقدس موقع پر تمام شہریوں کو مبارکباد پیش کرتا ہوں۔ انہوں نے کہا کہ بھگوان مہاویر کے اصول، اہنسا (عدم تشدد)، انیکتا (کثرتیت) اور اپریگرہ (عدم ملکیت) آج کے چیلنجز سے نمٹنے میں گہری رہنمائی فراہم کرتے ہیں۔ ان کے مطابق یہ تہوار ہمیں سچائی، ہمدردی، ہم آہنگی اور بھائی چارے کے تئیں اپنی وابستگی کو مضبوط کرنے کی ترغیب دیتا ہے۔
