[]
دہلی میں آج ہلکی سے درمیانی بارش کا امکان ہے، جبکہ نوئیڈا میں بھی بھاری بارش ہو سکتی ہے۔ وہیں، کشمیر سے کیرالہ تک کئی ریاستوں میں شدید بارش کا الرٹ جاری کیا گیا ہے
دہلی میں بارش / یو این آئی
نئی دہلی: ان دنوں ملک کے نصف سے زیادہ حصوں میں بارش کا سلسلہ جاری ہے۔ کہیں یہ بارش راحت دے رہی ہے تو کہیں مسئلہ بن گئی ہے۔ پہاڑوں پر بارش کی وجہ سے لینڈ سلائیڈنگ جیسے مسائل سامنے آ رہے ہیں، جبکہ میدانی علاقوں میں ندی نالوں میں آبی سطح میں اضافہ ہو رہا ہے۔ تاہم بارش سے کئی مقامات پر چلچلاتی گرمی میں بھی راحت ملی ہے۔ محکمہ موسمیات نے آج بھی کئی ریاستوں میں موسلادھار بارش کا الرٹ جاری کیا ہے۔
دہلی میں آج (8 جولائی) صبح سے بارش ہو رہی ہے۔ کئی علاقوں میں تو رات دیر گئے سے صبح تک بارش ہوئی، جس کی وجہ سے موسم خوشگوار ہو گیا ہے۔ راجدھانی میں تاحال مطلع ابر آلود نظر آ رہا ہے۔ موسم کی پیش گوئی کے مطابق دہلی میں آج ہلکی سے درمیانی بارش کا امکان ہے۔ اس کے ساتھ درجہ حرارت میں بھی کمی دیکھی جا رہی ہے۔ آئی ایم ڈی کے مطابق آج کم سے کم درجہ حرارت 26 ڈگری سیلسیس اور زیادہ سے زیادہ 32 ڈگری سیلسیس تک پہنچ سکتا ہے۔ کل بھی دہلی میں ہلکی بارش کا امکان ہے۔
اتر پردیش میں بھی آج بارش کا سلسلہ جاری ہے۔ محکمہ موسمیات نے راجدھانی لکھنؤ میں بارش یا گرج چمک کے ساتھ بونداباندی کی پیش گوئی کی ہے۔ اس کے علاوہ یہاں مطلع عام طور پر ابر آلود رہے گا۔ درجہ حرارت کی بات کریں تو کم سے کم درجہ حرارت 27 ڈگری سیلسیس اور زیادہ سے زیادہ 35 ڈگری سیلسیس ہو سکتا ہے۔ نوئیڈا میں آج شدید بارش کا امکان ہے۔ یہاں کم سے کم درجہ حرارت 25 ڈگری اور زیادہ سے زیادہ 31 ڈگری تک گر سکتا ہے۔
اس کے علاوہ موسم کی پیشین گوئی کرنے والی ایجنسی اسکائی میٹ کے مطابق آج گجرات، کونکن اور گوا، ساحلی کرناٹک، کیرالہ، تلنگانہ کے کچھ حصوں، ودربھ، جنوبی مدھیہ پردیش اور چھتیس گڑھ کے کچھ حصوں میں ہلکی سے بھاری بارش ہو سکتی ہے۔ ذیلی ہمالیائی مغربی بنگال، سکم، آسام کے کچھ حصوں، اروناچل پردیش، لکشدیپ، انڈمان اور نکوبار جزائر اور جنوب مغربی راجستھان میں ایک یا دو مقامات پر ہلکی سے درمیانی بارش کا امکان ہے۔
وہیں، شمال مشرقی ہندوستان، جموں و کشمیر، اتراکھنڈ، ہماچل پردیش، راجستھان کے کچھ حصوں، دہلی این سی آر، مغربی اتر پردیش، مدھیہ پردیش کے باقی حصوں، بہار کے کچھ حصوں، گنگا مغربی بنگال اور چھتیس گڑھ میں ہلکی سے درمیانی بارش ہو سکتی ہے۔ شمالی راجستھان، ساحلی اڈیشہ، ساحلی آندھرا پردیش، اندرونی تمل ناڈو، اندرونی کرناٹک اور لداخ میں بھی ہلکی بارش ہو سکتی ہے۔
