[]
حیدرآباد: مجلس بچاؤ تحریک کے زیر اہتمام 7 اکتوبر کو بعد نماز عشاء جونیئر کالج چنچل گوڑہ پر جشن میلادالنبیؐ کا اہتمام کیا جارہا ہے جس میں ملک وبیرون ممالک کے نامور علماء کرام و مشائخین عظام شرکت فرماتے ہوئے اپنے بصیرت افروز خطابات کے ذریعہ شمع محمدی ؐ کے پروانوں کے قلوب کو منور کریں گے۔
ان خیالات کا اظہار ابراہیم فنکشن ہال میں منعقدہ جلسہ رحمۃ للعٰلمین ؐ کے مشاورتی اجلاس کو مخاطب کرتے ہوئے صدر تحریک مجید اللہ خاں فرحت اور امجد اللہ خاں خالد ترجمان تحریک نے کیا۔
مجید اللہ خان نے کہا کہ تحریک اپنے قیام کے بعد سے جشن رحمۃ للعٰلمین ؐ کا اہتمام انتہائی عقیدت واحترام اور پورے خشوع و خضوع کے ساتھ کرتے ہوئے آرہی ہے۔
انہوں نے کہا کہ اس جشن کا مقصد و منشا یہ ہے کہ نوجوان نسل کو سرکارِ دو جہاں حضور اکرمؐ کی سیرت پاکؐ سے واقف کروایا جائے۔
امجد ا للہ خاں خالد نے کہا کہ تحریک گزشتہ 32 برسوں سے نامساعد حالات کے باوجود سرکارؐ کا جشن عظیم الشان پیمانے پر منعقد کررہی ہے۔
اجلاس کو جنرل سکریٹری سید مصطفیٰ محمود‘ ماجد خاں‘ الطاف‘ نصیب خاں‘ سکندر اللہ خاں کے علاوہ دیگر نے مخاطب کیا۔
