بہار: ایم ایل سی سنیل کمار کی رکنیت بحال، حکومت پر لگائے آمرانہ طرز عمل کے الزامات

پٹنہ: راشٹریہ جنتا دل (آر جے ڈی) کے ایم ایل سی سنیل کمار جمعرات کو اپنی رکنیت کی بحالی کے بعد بہار قانون ساز کونسل پہنچے۔ اس موقع پر انہوں نے فتح (وکٹری) کا نشان بنایا اور حکومت کو سخت تنقید کا نشانہ بنایا۔ انہوں نے کہا کہ وہ ہمیشہ سچ کی آواز بلند کرتے رہیں گے اور حکومت کے آمرانہ رویے کے خلاف لڑائی جاری رکھیں گے۔

سنیل کمار نے سپریم کورٹ کے فیصلے پر خوشی کا اظہار کرتے ہوئے کہا کہ عدالت نے انہیں انصاف دیا اور واضح کر دیا کہ کوئی بھی حکومت قانون سے بالاتر نہیں۔ انہوں نے کہا کہ یہ کامیابی صرف ان کی نہیں بلکہ آر جے ڈی کے لاکھوں کارکنوں کی جیت ہے، جو ہر مشکل میں ان کے ساتھ کھڑے رہے۔

میڈیا سے گفتگو کرتے ہوئے سنیل کمار نے کہا کہ وہ درحقیقت آمرانہ طرز عمل کے شکار ہوئے ہیں۔ انہوں نے بہار کی حکومت پر بدعنوانی میں ملوث ہونے کا الزام لگایا اور کہا کہ ریاست میں کرپشن اپنی انتہا پر پہنچ چکا ہے۔ انہوں نے حکومت کو خبردار کرتے ہوئے کہا کہ چاہے کچھ بھی ہو جائے، وہ ان کی آواز کو دبانے میں کامیاب نہیں ہو سکتی۔ انہوں نے کہا کہ وہ ہمیشہ مظلوموں اور کسانوں کی آواز بلند کرتے رہے ہیں اور آئندہ بھی کرتے رہیں گے۔

بجٹ پر اپنی رائے دیتے ہوئے سنیل کمار نے کہا کہ بہار کے عوام کو صرف کاغذی دعووں سے بہلایا جا رہا ہے۔ بجٹ میں ریاست کے کسانوں اور غریب عوام کے لیے کچھ نہیں رکھا گیا، بلکہ انہیں دھوکہ دیا جا رہا ہے۔ انہوں نے کہا کہ بہار میں قانون کی حکمرانی اور بدعنوانی پر بات کرنا اب بے معنی ہو چکا ہے۔

واضح رہے کہ سنیل کمار کو وزیر اعلیٰ نتیش کمار کی نقل اتارنے کے الزام میں بہار قانون ساز کونسل کی رکنیت سے محروم کر دیا گیا تھا۔ تاہم، 25 فروری کو سپریم کورٹ نے ان کے حق میں فیصلہ سناتے ہوئے ان کی رکنیت بحال کرنے کا حکم دیا تھا۔ حالیہ دنوں میں بہار قانون ساز کونسل کے چیئرمین اویناش نارائن سنگھ نے ایوان میں اس کا باضابطہ اعلان کرتے ہوئے کہا کہ سپریم کورٹ کے فیصلے کے مطابق آر جے ڈی کے ایم ایل سی سنیل کمار کی رکنیت بحال کی جا رہی ہے۔