'آج سے آپ کے برے دن شروع '، ٹرمپ کی زیلنسکی کو دھمکی

یوکرین کے صدر وولودیمیر زیلنسکی نے جمعہ  یعنی 28 فروری کو وائٹ ہاؤس میں امریکی صدر ڈونالڈ ٹرمپ سے ملاقات کی۔ دونوں رہنماؤں نے یوکرین میں برسوں سے جاری جنگ اور امریکہ کے لیے معدنیات کے سودوں پر تبادلہ خیال کیا۔ خبر رساں ادارے ایسوسی ایٹڈ پریس کی رپورٹ کے مطابق زیلنسکی نے ٹرمپ کے سامنے پوتن کو دہشت گرد قرار دیتے ہوئے کہا کہ دنیا کو کسی قاتل سے سمجھوتہ کرنے کی ضرورت نہیں۔ اس پر ٹرمپ نے کہا کہ یوکرین کو روس کے ساتھ امن معاہدہ کرنا ہوگا۔

امن معاہدے کے ذکر پر زیلنسکی کو غصہ آیا اور ٹرمپ کے ساتھ ان کی گرما گرم بحث ہوئی۔ زیلنسکی نے کہا کہ ہم کسی بھی جنگ بندی کو قبول نہیں کریں گے۔ اس پر ٹرمپ نے کہا کہ “آپ کا ملک مشکل میں ہے، آپ ہمیں نہیں بتاسکتے کہ کیا کرنا ہے، آپ تیسری عالمی جنگ کا جوا کھیل رہے ہیں، آپ ہمیں آرڈر دینے کی پوزیشن میں نہیں ہیں، ہم نے آپ کو ہتھیار، 350 بلین ڈالر دیے، اگر آپ سمجھوتہ نہیں کریں گے تو ہم اس سے نکل جائیں گے۔”

امریکی صدر نے یہ بھی کہا کہ انہیں امید ہے کہ انہیں ایک امن ساز کے طور پر یاد رکھا جائے گا۔ ٹرمپ نے کہا کہ میں لوگوں کی جان بچانے کے لیے امن معاہدہ چاہتا ہوں، یوکرین ہماری وجہ سے محفوظ ہے۔ دونوں رہنماؤں کے درمیان بحث اس قدر گرم ہو گئی کہ امریکی نائب صدر جے ڈی وینس کو مداخلت کرنا پڑی۔ ڈونالڈ ٹرمپ نے زیلنسکی کو دھمکی بھی دی۔ انہوں نے کہا کہ آج سے تمہارے برے دن شروع ہو گئے ہیں۔

زیلنسکی کا کہنا تھا کہ “جنگ کے دوران بھی قوانین ہوتے ہیں۔ امریکہ جنگ میں ہلاکتوں کو روکنا چاہتا ہے۔ ڈونالڈ ٹرمپ ہمارے ساتھ ہیں۔ زیلنسکی نے ٹرمپ کو جنگ میں روس کی جانب سے کیے جانے والے مظالم کی تصاویر بھی دکھائیں۔ امریکہ کا پیسہ یوکرین میں تعمیر نو جیسے مختلف کاموں کے لیے استعمال کیا جانا چاہیے۔” اس ملاقات میں زیلنسکی نے معدنیات کے سودے کے بدلے سیکیورٹی کی ضمانتوں کا مطالبہ کیا ہے۔ تاہم ٹرمپ نے کہا کہ وہ معدنی ذخائر کو اپنی سہولت کے مطابق استعمال کریں گے۔