ایس ایل بی سی کے زیر تعمیر حصہ پر واقع ٹنل کا ایک حصہ منہدم ہو گیا جس میں کئی مزدور پھنس گئے ہیں۔ کمپنی نے جانچ کے لیے ایک ٹیم کو اندر بھیجا ہے۔
تلنگانہ میں ہفتہ کے روز ٹنل کا ایک حصہ منہدم ہو جانے سے تقریباً 3 درجن مزدوروں کی جان مشکل میں پھنس گئی ہے۔ شری شیلم باندھ کے پیچھے واقع ٹنل کا ایک حصہ منہدم ہونے کی خبر ہے۔ یہ نگرکرنول ضلع میں سری شیلم لیفٹ بینک نہر (ایس ایل بی سی) کے زیر تعمیر حصہ پر واقع ہے۔ کمپنی نے جانچ کے لیے ایک ٹیم کو اندر بھیجا ہے۔
اس حادثہ کی خبر ملنے پر وزیر اعلیٰ ریونت سنگھ ریڈی نے شدید افسوس کا اظہار کیا۔ انھوں نے افسران کو ہیلی کاپٹر سے جائے حادثہ پر فوراً پہنچنے کی ہدایت بھی دی ہے تاکہ ضروری اقدامات اٹھائے جا سکیں۔ ایک آفیشیل بیان کے مطابق ٹنل کے 14 کلومیٹر اندر بائیں طرف واقع چھت 3 میٹر تک منہدم ہو گئی ہے۔
حادثہ کے تعلق سے وزیر اعلیٰ دفتر نے اپنے بیان میں کہا کہ ’’ٹنل منہدم ہونے اور کئی لوگون کے زخمی ہونے کی اطلاع ملنے کے بعد وزیر اعلیٰ نے فوراً افسران کو مستعد کیا۔ انھوں نے ضلع کلکٹر، ایس پی، فائر بریگیڈ محکمہ، ہائیڈرا اور آبپاشی محکمہ کے افسران کو فوراً موقع پر پہنچنے اور راحتی قدم اٹھانے کا حکم دیا۔‘‘ حادثہ کے بعد راحت رسانی کا کام تیزی کے ساتھ جاری ہے۔ ٹنل میں پھنسے مزدوروں کو بہ حفاظت باہر نکالنے کے لیے بچاؤ ٹیم نے اپنی کوششیں شروع کر دی ہیں۔
حادثہ کی جانچ اور مزدوروں کی حفاظت یقینی بنانے کے لیے سبھی ضروری اقدام کیے جا رہے ہیں۔ حکومت اور انتظامیہ کے ذریعہ اس افسوسناک حادثہ سے نمٹنے کے لیے ہر ممکن کوششیں ہو رہی ہیں۔ مقامی افسران اور راحت رسانی میں مصروف اہلکاروں کی بھرپور کوشش ہے کہ پھنسے ہوئے مزدوروں کو جلد از جلد باہر نکالا جائے۔
