کانگریس دفتر میں منموہن سنگھ کو دی گئی آخری وداعی، سونیا، راہل، پرینکا سمیت کئی بڑے رہنما موجود

سابق وزیر اعظم ڈاکٹر منموہن سنگھ کا جسد خاکی کانگریس دفتر پہنچ چکا ہے۔ یہاں سے ان کا آخری سفر دہلی کے نگم بودھ گھاٹ تک ہوگا، جہاں 11:45 بجے ان کی آخری رسوم ادا کی جائے گی۔ منموہن سنگھ کو آخری وداعی دینے کے لیے وزیر اعظم نریندر مودی بھی نگم بودھ گھاٹ پہنچیں گے۔ جس وقت آنجہانی ڈاکٹر منموہن سنگھ کا جسد خاکی کانگریس دفتر پہنچا اس وقت انہیں وداعی دینے کے لیے تمام رہنما اور بڑی ہستیاں موجود تھیں۔

کانگریس رہنما راہل گاندھی منموہن سنگھ کے کنبہ کو خود کانگریس دفتر میں لے کر گئے۔ پرینکا گاندھی واڈرا بھی اے آئی سی سی دفتر پہنچ چکی ہیں۔ اس کے علاوہ سونیا گاندھی، ملکارجن کھڑگے، پی چدمبرم سمیت بڑی تعداد میں سینئر رہنما موجود ہیں۔ کانگریس پارٹی دفتر میں آنجہانی ڈاکٹر منموہن سنگھ کا جسد خاکی پارٹی کارکنان کے آخری دیدار کے لیے رکھا گیا ہے۔

اس سے قبل فوج کی گاڑی کانگریس دفتر کے باہر رکی اور ترنگے میں لپٹے ڈٓاکٹر منموہن سنگھ کے جسد خاکی کو کندھوں پر اٹھا کر اندر لے جایا گیا۔ ایک گھنٹے یہاں پر کانگریس رہنما اور کارکنان اپنے مقبول رہنما آنجہانی ڈاکٹر منموہن سنگھ کا آخری دیدار کریں گے۔ اس کے بعد ان کا جسد خاکی آخری سفر کے لیے روانہ ہوگا۔