[]
نئی دہلی: کانگریس کے سینئر لیڈر اور لوک سبھا میں قائد حزب اختلاف راہل گاندھی کے خلاف بھارتیہ جنتا پارٹی (بی جے پی) نے اقدام قتل کا مقدمہ درج کروایا ہے۔ بی جے پی کا الزام ہے کہ پارلیمنٹ کے احاطے میں پیش آئے ہنگامے کے دوران راہل گاندھی کی مبینہ طور پر دھکا دینے کی حرکت کی وجہ سے ان کے دو ارکان پارلیمنٹ زخمی ہو گئے۔
یہ واقعہ اس وقت پیش آیا جب انڈیا اتحاد نے پارلیمنٹ کے احاطے میں مرکزی وزیر داخلہ امیت شاہ کے ڈاکٹر بی آر امبیڈکر سے متعلق ریمارکس کے خلاف احتجاج کیا۔ احتجاج کے دوران صورتحال کشیدہ ہوگئی اور دھکم پیل جیسی صورتحال پیدا ہوگئی۔
بی جے پی کے دونوں زخمی ارکان پارلیمنٹ کو فوری طور پر آر ایم ایل ہسپتال منتقل کیا گیا، جہاں ان کا علاج جاری ہے۔ ذرائع کے مطابق دونوں ارکان کی حالت مستحکم بتائی گئی ہے۔ وزیراعظم نریندر مودی نے زخمی ارکان سے فون پر بات کی اور ان کی صحت سے متعلق معلومات حاصل کیں۔
بی جے پی نے راہل گاندھی پر شدید تنقید کرتے ہوئے ان پر پارلیمانی اقدار کو پامال کرنے کا الزام عائد کیا ہے۔ پارٹی نے دہلی پولیس میں شکایت درج کرواتے ہوئے ان کے خلاف سخت کارروائی کا مطالبہ کیا ہے۔
دوسری جانب کانگریس نے ان الزامات کو مسترد کرتے ہوئے کہا ہے کہ یہ بی جے پی کی جانب سے اپوزیشن کو بدنام کرنے کی کوشش ہے۔ پارٹی نے واقعہ کی مکمل تحقیقات کا مطالبہ کرتے ہوئے دعویٰ کیا کہ بی جے پی کے الزامات بے بنیاد ہیں۔ یہ واقعہ پہلے سے ہی کشیدہ پارلیمانی ماحول کو مزید گرم کر رہا ہے۔
