اجیت پوار نے این ڈی اے کے اجلاس میں  کہا-’ لوک سبھا انتخابات ہم ساتھ لڑیں گے‘

بنگلورو میں اپوزیشن پارٹیوں کی میٹنگ ختم ہونے کے بعد  دہلی میں  این ڈی اے کی میٹنگ  ہوئی  اور اس میں نمبروں کے حساب سے زیادہ پارٹیاں شریک ہوئیں۔ مہاراشٹر کے  نائب وزیر اعلی اجیت پوار جو گزشتہ ہفتے میں تین مرتبہ اپنے چچا اور این سی پی کے سربراہ شرد پوار سے  ملے وہ اس میٹنگ میں شریک ہوئے  ۔ انہوں نے  اس میٹنگ میں لوک سبھا میں بی جے پی کے ساتھ اتحاد کا بھی اعلان کیا۔ این ڈی اے کی میٹنگ میں انہوں نے کہا کہ لوک سبھا انتخابات میں ’ہم ایک ساتھ رہیں گے اور ہم مل کر لوک سبھا میں زیادہ سیٹیں جیتیں گے۔‘

دوسری طرف،  مہاراشٹر کے وزیر اعلی  ایکناتھ شندے نے کہا کہ این ڈی اے مستقبل میں مضبوط ہوگی اور مہاراشٹر میں لوک سبھا انتخابات میں 45 سیٹوں پر کامیابی حاصل کرے گی۔انہوں نے کہا کہ  دیویندر فڑنویس کے ساتھ مل کر مہاراشٹڑ میں  45 سیٹیں جیتنے کے لیے الیکشن لڑیں گے۔ ذرائع کے مطابق ان دونوں لیڈروں نے این ڈی اے میٹنگ میں 10-10 منٹ تک اپنی بات رکھی۔ بتا دیں کہ مہاراشٹر میں لوک سبھا کی 48 سیٹیں ہیں۔

اہم بات یہ ہے کہ مہاراشٹر میں اگلے سال ہونے والے اسمبلی انتخابات اور لوک سبھا انتخابات سے پہلے پورے ملک میں ایک بڑی سیاسی ہلچل دیکھنے کو ملی۔ اجیت پوار نے این سی پی میں بغاوت کر دی۔ اس سے شرد پوار کی پارٹی میں پھوٹ پڑ گئی۔ اجیت پوار کے ساتھ، کل نو ایم ایل اے نے مہاراشٹر میں ایکناتھ شندے کی حکومت میں وزیر کے طور پر حلف لیا۔ ماضی میں، اجیت پوار سمیت تمام نو ایم ایل ایز کو وزارتی عہدے بھی الاٹ کیے گئے تھے۔ اجیت پوار کو مالیات اور منصوبہ بندی کے محکمے کا چارج دیا گیا تھا۔ واضح رہے اجیت پوار کو ان کی مرضی کی وزارتیں ملی ہیں۔

اجیت پوار نے این ڈی اے کے ساتھ لوک سبھا الیکشن لڑنے کا اعلان کیا ہے۔ یعنی اجیت پوار کا شیو سینا اور بی جے پی کے ساتھ اتحاد 2024 تک برقرار رہنے والا ہے۔ دلچسپ بات یہ ہے کہ ماضی میں اجیت پوار کے ساتھ ان کے دھڑے کے قانون سازوں نے این سی پی سربراہ شرد پوار سے ملاقات کی تھی اور راستہ نکالنے کو کہا تھا۔ دریں اثنا، اب اجیت پوار نے اپنے ارادے واضح کر دیے ہیں اور واپسی کے امکان کو ختم کر دیا ہے۔