سی این جی کے داموں میں پھر اضافہ، تین ہفتوں میں دوسری مرتبہ لگا عوام کو جھٹکا

نئی دہلی: دہلی-این سی آر کے لوگوں کو جمعرات کی صبح مہنگائی کا بڑا جھٹکا لگا، کیونکہ دارالحکومت دہلی اور ملحقہ نوئیڈا اور غازی آباد میں سی این جی کی قیمتوں میں اضافہ کیا گیا ہے۔ نئی قیمتوں کا اطلاق آج سے ہو گیا ہے۔ آئل مارکیٹنگ کمپنیوں کے مطابق ان شہروں کے لیے سی این جی کی قیمتوں میں ایک روپے فی کلو اضافہ کیا گیا ہے۔

تازہ ترین تبدیلی کے بعد، دہلی کے لیے سی این جی کی نئی قیمت 76.59 روپے فی کلوگرام، نوئیڈا 82.20 روپے فی کلوگرام اور غازی آباد اور گریٹر نوئیڈا میں 81.20 روپے فی کلو ہو گئی۔ قابل ذکر ہے کہ گزشتہ 20 دنوں میں سی این جی کی قیمتوں میں یہ مسلسل دوسرا اضافہ ہے۔

اس سے قبل 23 نومبر کو بھی دہلی-این سی آر میں سی این جی کی قیمت میں ایک روپے فی کلو کا اضافہ کیا گیا تھا، جس کے بعد دہلی میں سی این جی کی قیمت 74.59 روپے فی کلو سے بڑھ کر 75.59 روپے فی کلوگرام، نوئیڈا میں 80.20 روپے فی کلو سے بڑھ کر 81.20 روپے فی کلو، گریٹر نوئیڈا میں 79.20 روپے سے بڑھ کر 80.20 روپے اور غازی آباد میں یہ 79.20 روپے فی کلو سے بڑھ کر 80.20 روپے ہو گئی تھی۔