راہل گاندھی نے ایکس پر جاری اپنے پیغام میں کہا کہ اگر کسی طالب علم نے پرچہ افشا ہونے، امتحانات میں بے ضابطگیوں یا بڑھتی ہوئی فیسوں کی وجہ سے مشکلات کا سامنا کیا ہے، اگر موجودہ نظام نے اس کے خواب توڑے ہیں یا اگر خاندان نے اس کی تعلیم کے لیے زندگی بھر کی جمع پونجی خرچ کی ہے تو ’چھاتروں کی گونج‘ اسی کی آواز ہے۔ انہوں نے کہا کہ یہ محض ایک مہم نہیں بلکہ نوجوانوں کے مطالبات حکومت تک پہنچانے کا ذریعہ ہے۔ ان کے مطابق سستی تعلیم، منصفانہ امتحانات اور باوقار روزگار ہر طالب علم کا حق ہے۔
کانگریس رہنما نے طلبہ سے اپیل کی کہ وہ اس مہم میں شامل ہو کر اپنے خیالات اور تجاویز پیش کریں اور دستخطی مہم کا حصہ بنیں تاکہ زیادہ سے زیادہ آوازیں ایک مشترکہ مطالبے میں تبدیل ہو سکیں۔ انہوں نے کہا کہ ہر دستخط اس جدوجہد کو مزید طاقت دے گا۔
