آبنائے ہرمز کشیدگی کے درمیان ایئرلائنز کو حاصل ہوا حفاظتی ڈھال، 18 ہزار کروڑ کی کریڈٹ گارنٹی اسکیم کو ملی منظوری

مشرق وسطیٰ میں جاری جنگ کے درمیان گلوبل ٹریڈ اور تیل سپلائی میں آئے رخنہ نے ہندوستان کی فکر میں اضافہ کر دیا ہے۔ خصوصاً ایئرلائنز اور درآمدات و برآمدات سے جڑی کمپنیوں پر بڑھتے دباؤ کو دیکھتے ہوئے ہندوستان کی وفاقی کابینہ نے تقریباً 18 ہزار کروڑ روپے پر مشتمل ایک خصوصی قرض گارنٹی منصوبہ کو منظوری دی ہے۔ اس ’حفاظتی ڈھال‘ کا مقصد بحران زدہ کاروباروں کو اضافی لکویڈیٹی فراہم کرنا، ملازمت کو بچانا اور معاشی ترقی کی رفتار کو بنائے رکھنا ہے۔

ایران کے ساتھ بڑھتی جنگ کے خطرات اور اسٹریٹجک طور سے اہم آبنائے ہرمز میں کشیدگی کے درمیان حکومت ہند نے کارپوریٹ اور ہوابازی سیکٹر کو یہ بڑی راحت دی ہے۔ وزیر اعظم کی صدارت میں منگل کے روز ہوئی کابینہ میٹنگ میں تقریباً 18 ہزار کروڑ روپے کا پونجی الاٹ کرنے کے ساتھ ایک نئے قرض گارنٹی منصوبہ کو ہری جھنڈی دکھائی ہے۔

حکومت کے ذریعہ جاری آفیشیل بیان کے مطابق یہ منصوبہ ان مقروضوں اور کمپنیوں کے لیے ہے جن کا آپریشن جنگ کے سبب متاثر ہوا ہے۔ اس منصوبہ کے تحت سرکاری بینکوں اور مالیاتی اداروں کو خود مختار گارنٹی فراہم کرے گی، جس سے وہ بغیر کسی اضافی جوکھم کے متاثر کمپنیوں کو قرض دے سکیں گے۔ اس پیش قدمی کا اہم مقصد ایئرلائنز کے آپریشن کو برقرار رکھنا ہے، جو موجودہ وقت میں بدلے گئے راستوں اور ایندھن کی بڑھتی قیمتوں کے سبب شدید نقصان برداشت کر رہی ہیں۔

یہ ایمرجنسی قرض گارنٹی منصوبہ کافی حد تک اس ماڈل پر مبنی ہے جسے کووڈ-19 وبا کے دوران ایم ایس ایم ای کے لیے نافذ کیا گیا تھا۔ مارچ 2023 تک کے اعداد و شمار بتاتے ہیں کہ حکومت نے اس وقت 2.42 ٹریلین روپے کی گارنٹی دی تھی، جس سے لاکھوں کاروباروں کو ڈوبنے سے بچایا گیا تھا۔ اب اسی طرز پر ایران جنگ کے اثرات کو کم کرنے کی کوششیں کی جا رہی ہیں۔