الور: راجستھان کے ضلع الور کے رینی تھانہ علاقے میں بدھ کی علی الصبح دہلی–ممبئی ایکسپریس وے پر ایک انتہائی دل دہلا دینے والا حادثہ پیش آیا، جس میں ایک پک اپ گاڑی میں آگ لگنے سے 3 افراد موقع پر ہی زندہ جل کر جاں بحق ہو گئے، جبکہ گاڑی کا ڈرائیور شدید طور پر جھلس گیا۔
پولیس کے مطابق یہ حادثہ ایکسپریس وے کے چینل نمبر 131.5 پر پیش آیا، جہاں دہلی سے جے پور کی طرف جا رہی پِک اَپ آگے چل رہے ایک ٹرک سے ٹکرا گئی۔ ٹکر کے فوراً بعد پِک اَپ سے چنگاریاں اٹھیں اور چند ہی لمحوں میں گاڑی شعلوں کی لپیٹ میں آ گئی۔ آگ اتنی تیزی سے پھیلی کہ گاڑی میں سوار افراد کو باہر نکلنے کا موقع تک نہ مل سکا۔
