بہار بند: ’ووٹر لسٹ میں چھیڑ چھاڑ سے غریبوں کے ووٹ چھیننے کی کوشش، یہ انتخابی چوری ہے‘، راہل گاندھی کا بیان

راہل گاندھی نے کہا، ’’ایک ایک بلڈنگ میں 4,000 سے 5,000 ووٹر رجسٹر کیے گئے، جبکہ غریب طبقے کے ووٹ کاٹ دیے گئے۔ یہ سچ چھپانے کے لیے انتخابی قوانین میں بھی چپ چاپ تبدیلی کی گئی۔‘‘

راہل گاندھی نے انتخابی کمیشن پر جانبداری کا الزام لگاتے ہوئے کہا، ’’آج الیکشن کمیشن بی جے پی اور آر ایس ایس کی زبان بول رہا ہے، جبکہ اس کا کام آئین کی حفاظت کرنا ہے، نہ کہ کسی سیاسی جماعت کے لیے کام کرنا۔ پہلے سی جے آئی، اپوزیشن اور حکومت تینوں مل کر چیف الیکشن کمشنر کا انتخاب کرتے تھے لیکن اب مودی حکومت نے سی جے آئی کو اس عمل سے نکال دیا اور ہمیں صرف نام بتا کر کہہ دیا کہ یہ منتخب ہو چکے ہیں۔‘‘