نئی دہلی: دہلی میں مقدس سفرِ حج کی تیاریاں عروج پر پہنچ گئی ہیں۔ عازمینِ حج کی پہلی پرواز رواں ماہ کی 30 تاریخ کو روانہ ہوگی، جس کے پیش نظر دہلی اسٹیٹ حج کمیٹی نے ہر سال کی روایت کو برقرار رکھتے ہوئے اس سال بھی اپنے دفتر حج منزل میں ٹیکہ کاری کیمپ کا انعقاد کیا ہے۔
اس کیمپ کا افتتاح دہلی اسٹیٹ حج کمیٹی کی چیئرپرسن کوثر جہاں نے کیا۔ انہوں نے اس موقع پر کیمپ میں موجود عازمین، بالخصوص خواتین سے ملاقات کی اور انہیں مقدس سفر پر روانگی کی مبارکباد دی۔ کوثر جہاں نے بتایا کہ اس سال حج کے سفر کو زیادہ منظم، سہل اور خوشگوار بنانے کے لیے کئی نئی سہولیات متعارف کرائی گئی ہیں۔
