حیدرآباد ۔ کے این واصف
عام حالات میں بھی ہمیں پانی کے استعمال میں احتیاط برتنے اور اس کو ضائع نہ کرنے کی تلقین کی گئی ہے۔ جبکہ آب زم زم تو ایک مقدس پانی ہے۔ اس سلسلہ میں ادارہ امور حرمین شریفین نے زائرین حرم سے اپیل کی ہے کہ آب زم زم کے استعمال میں احتیاط برتیں۔ پانی پینے کے بعد استعمال شدہ گلاسوں کو مخصوص مقام پر ڈالیں اور کولر کے ڈھکن کو نہ کھولا جائے۔سعودی خبر رساں ایجنسی “ایس پی اے” کے مطابق ادارہ امور حرمین کی جانب سے زائرین کو ہدایات کی گئی ہے کہ انتظامیہ کی جانب سے رمضان المبارک میں آب زم زم کی مستقل فراہمی کا خصوصی اہتمام کیا جاتا ہے۔
زم زم کی مستقل فراہمی کو یقینی بنانے کے لیے 20 ہزار کولرز مسجد الحرام کے مختلف مقامات پر رکھے گئے ہیں جن میں گلاس بھی موجود ہیں علاوہ ازاں استعمال شدہ گلاسوں کو رکھنے کی جگہ بھی مخصوص ہے دارہ حرمین کا مزید کہنا تھا کہ مسجد الحرام میں وضو کے لیے جگہیں مخصوص ہیں جہاں باسانی وضو کی جاسکتی ہے اس لیے اس بات کا خیال رکھا جائے کہ آب زم زم کی سہولت پینے کے لیے فراہم کی گئی ہے۔
واضح رہے بعض لوگ آب زم زم کولروں سے وضو کرتے ہیں جس کی وجہ سے وہ جگہ گیلی ہو جاتی ہے اور دوسروں کے لیے مسائل و مشکلات کا باعث بنتی ہے۔
