گزشتہ 5 سالوں میں کریڈٹ کارڈ کی تعداد ہوئی دوگنی، لین دین میں بھی اضافہ: آر بی آئی

ہندوستان میں کریڈٹ کارڈ کی تعداد گزشتہ 5 سالوں میں دسمبر 2024 تک دوگنی ہوکر 10.80 کروڑ ہو گئی ہے جو دسمبر 2019 میں 5.53 کروڑ تھی۔ اس کے برخلاف ڈیبٹ کارڈ کی تعداد میں معمولی اضافہ ہوا ہے۔ دیبٹ کارڈ کی تعداد دسمبر 2019 میں 80.53 کروڑ تھی جو 2024 میں معمولی اضافے کے ساتھ 99.09 کروڑ ہو گئی ہے۔ آر بی آئی کی جانب سے جاری کردہ رپورٹ کے مطابق 2024 میں کریڈٹ کارڈ سے 447.23 کروڑ کا لین دین ہوا اور اس کی قیمت 20.37 لاکھ کروڑ روپے تھی۔ وہیں ڈیبٹ کارڈ سے 173.90 کروڑ کا لین دین ہوا اور اس کی قیمت 5.16 لاکھ کروڑ روپے تھی۔

واضح ہو کہ رپورٹ میں اس بات کی بھی جانکاری دی گئی ہے کہ حالیہ سالوں میں ڈیبٹ کارڈ کے استعمال میں کافی کمی آئی ہے۔ جب کہ کریڈٹ کارڈ کے استعمال میں سالانہ بنیادوں پر 15 فیصد کا اضافہ ہوا ہے۔ پبلک سیکٹر کے بینکوں (پی ایس بی) کے ذریعہ جاری کی گئی کریڈٹ کارڈ کی تعداد دسمبر 2019 کے اخیر تک 122.6 لاکھ سے بڑھ کر دسمبر 2024 کے اخیر تک 257.6 لاکھ ہو گئی ہے جو 110 فیصد سے زیادہ کا اضافہ ہے۔ وہیں پرائیویٹ سیکٹر کے بینکوں کے ذریعہ دسمبر 2024 کے اخیر تک 766 لاکھ کارڈ جاری کیے جا چکے ہیں۔ غیر ملکی بینکوں کے ذریعہ جاری کیے گئے کریڈٹ کارڈ کی تعداد میں کمی آئی ہے اور دسمبر 2024 تک ان کی تعداد 45.94 لاکھ رہ گئی ہے جو کہ دسمبر 2019 میں 65.79 لاکھ تھی۔ اس دوران مارکیٹ شیئر بھی 11.9 فیصد سے کم ہو کر 4.3 فیصد رہ گیا ہے۔

قابل ذکر ہے کہ آر بی آئی کی ایک اور رپورٹ میں کہا گیا کہ ہندوستان کے ڈیجیٹل پیمنٹ سسٹم میں یونیفائیڈ پیمنٹس انٹرفیس (یو پی آئی) کی حصہ داری 2024 میں بڑھ کر 83 فیصد ہو گئی ہے جو 2019 میں 34 فیصد تھی۔ بڑے پیمانے پر یو پی آئی لین دین کی والیوم بڑھ کر 2024 میں 17221 کروڑ ہو گئی ہے جو 2018 میں 375 کروڑ تھی۔ اس دوران کُل لین دین کی قیمت 5.86 لاکھ کروڑ روپے سے بڑھ کر 246.83 لاکھ کروڑ روپے ہو گئی ہے۔