کانگریس کے نئے ہیڈکوارٹر میں موجود لائبریری کو ڈاکٹر منموہن سنگھ سے منسوب کرنے کا اعلان

کانگریس کا ہیڈکوارٹر ’24، اکبر روڈ‘ سے ’9 اے، کوٹلہ روڈ‘ منتقل ہو چکا ہے۔ نئے ہیڈکوارٹر کو ’اندرا بھون‘ نام دیا گیا ہے، اور خاص بات یہ ہے کہ اس ہیڈکوارٹر میں موجود لائبریری کو سابق وزیر اعظم آنجہانی ڈاکٹر منموہن سنگھ سے منسوب کیا گیا ہے۔ اس سلسلے میں کانگریس صدر ملکارجن کھڑگے نئے ہیڈکوارٹر کی افتتاحی تقریب سے خطاب کرتے ہوئے دی۔ ساتھ ہی انھوں نے یہ بھی بتایا کہ لائبریری کا نام ڈاکٹر منموہن سنگھ کے نام پر رکھنے کو سونیا گاندھی نے بہت مناسب قرار دیا۔

اپنی تقریر کے دوران ملکارجن کھڑگے نے کہا کہ ’’میں ڈاکٹر منموہن سنگھ جی کے تاریخی تعاون کو یاد کرتے ہوئے انھیں خراج عقیدت پیش کرتا ہوں۔ اس کے ساتھ ہی یہ اعلان کرتا ہوں کہ اس ہیڈکوارٹر کی لائبریری کا نام ’ڈاکٹر منموہن سنگھ لائبریری‘ ہوگا۔‘‘ اپنی تقریر میں وہ یہ بھی کہتے ہیں کہ ’’ہم نے بہت بڑی لائبریری بنائی ہے۔ اس لائبریری کا نام ڈاکٹر منموہن سنگھ کے نام پر رکھنا ہے۔ میں یہ بتانا چاہتا ہوں کہ اس میں سب کا اتفاق شامل ہے۔‘‘

کانگریس صدر کھڑگے نے لائبریری کا نام ڈاکٹر منموہن سنگھ کے نام رکھنے میں سونیا گاندھی کی رضامندی بھی ظاہر کی۔ انھوں نے کہا کہ ’’ہماری لیڈر سونیا گاندھی جی نے کہا کہ ایسا کرنا (لائبریری کا نام ڈاکٹر منموہن سنگھ کے نام پر رکھنا) ٹھیک ہوگا۔ ایسا اس لیے کیونکہ جو لوگ ہم سے جڑے رہے ہیں ان کا احترام ہم ہمیشہ کرتے رہے ہیں اور آج بھی کریں گے۔‘‘ ساتھ ہی کھڑگے کہتے ہیں کہ ’’ڈاکٹر منموہن سنگھ جی کے جانے کے بعد ان کی اہمیت سبھی سمجھ رہے ہیں۔ ڈاکٹر منموہن نے ایک بار کہا تھا کہ ان کے ذریعہ کیے گئے کاموں کو ان کے جانے کے بعد لوگ یاد کریں گے، اور آج ایسا ہی دیکھنے کو مل رہا ہے۔‘‘

قابل ذکر ہے کہ ڈاکٹر منموہن سنگھ کو کتابوں سے بہت محبت تھی۔ اسی لیے کانگریس کے نئے ہیڈکوارٹر میں موجود لائبریری کا نام ان کے نام سے منسوب کیے جانے کو بہت اہم تصور کیا جا رہا ہے۔ ڈاکٹر منموہن سنگھ خود بھی اپنے گھر میں لائبریری رکھتے تھے جس میں سینکڑوں کتابیں موجود تھیں۔ ایک بار تو انھوں نے اپنی ذاتی لائبریری سے 3500 کتابیں ایک ادارہ کو عطیہ کی تھیں۔