[]
حیدرآباد: تلنگانہ اسٹیٹ مائناریٹیز کمیشن نے آج گجویل ٹاؤن کے واقعہ کا ازخود نوٹ لیااور پولیس کمشنر سدی پیٹ کو نوٹس جاری کرتے ہوئے اس واقعہ کی تفصیلی رپورٹ طلب کرلی ہے۔
کمیشن نے پیر کی شب گجویل ٹاؤن (ضلع سدی پیٹ) میں ایک مسلم نوجوان کو بعد زدوکوب کرنے، اسے نیم برہنہ پریڈ کرانے اور انہیں جئے شری رام کے نعرے لگانے پر مجبور کرنے بجرنگ دل، وشوا ہندوپریشد اور آر ایس ایس کے بند کے دوران متذکرہ نوجوان کو پیشاب چاٹنے پر مجبور کرنے کے واقعہ کے دوران پولیس کی خاموش تماشائی پر برہمی کا اظہار کیا۔
اس پورے ایپی سوڈ(واقعہ) کی ویڈیو گرافی کی گئی اور پھر اسے وائرل کردیا گیا جس سے اس واقعہ کی سنگینی کا علم ہوتا ہے۔
صدرنشین اسٹیٹ تلنگانہ مائناریٹیز کمیشن طارق انصاری نے اس واقعہ کی تحقیقات کرانے کا فیصلہ کیا ہے۔
انہوں نے کمشنر پولیس سدی پیٹ کوہدایت دی کہ وہ اس واقعہ کی انکوائری رپورٹ 11 جولائی سے قبل داخل کریں بصورت دیگر کمشنرکو کمیشن میں حاضر ہونا پڑے گا۔
کمیشن نے اس واقعہ کی تحقیقات انسپکٹر رینک کے عہدیدار سے کرانے کی ہدایت دی۔ کمیشن نے چہارشنبہ کے روز اس واقعہ پر ازخود کارروائی کرتے ہوئے ایک کیس 267/B/2023 درج کرلیا ہے۔
