بھارت جوڑو نیائے یاترا: ہم عوام کے مسائل کے لیے لڑتے ہیں، یہی یاترا کا مقصد ہے، راہل گاندھی

راہل گاندھی نے اپنی بھارت جوڑو یاترا اور نیائے کا مقصد بیان کرتے ہوئے کہا، ’’پچھلے سال ہم نے کنیا کماری سے کشمیر تک بھارت جوڈو یاترا کی تھی۔ اس کی دو تین وجوہات تھیں۔ ایک وجہ یہ تھی کہ آر ایس ایس-بی جے پی نے پورے ملک میں نفرت اور تشدد پھیلا دیا ہے۔ وہ ایک مذہب کو دوسرے مذہب سے، ایک ذات کو دوسری ذات سے، ایک زبان کو دوسری زبان سے لڑاتے ہیں۔ وہ ایسا کب کرتے ہیں؟ جب توجہ ادھر ادھر ہٹانا چاہتے ہیں۔‘‘

انہوں نے کہا، ’’ان کا مقصد صرف یہ ہے کہ آپ کا پیسہ چھین کر ان کی جیبوں میں جائے، اسی لیے ہم نے بھارت جوڑو یاترا کی اور 4000 کلومیٹر کا سفر طے کیا۔ اس دوران ہم کسانوں، مزدوروں، نوجوانوں سے ملے، ماؤں بہنوں سے ملے۔ نوجوانوں نے ہمیں بتایا، راہل جی، ملک کا سب سے بڑا مسئلہ بے روزگاری ہے۔ ہم ڈگری لیتے ہیں، کالج میں پڑھتے ہیں، یونیورسٹی میں پڑھتے ہیں، اسکول میں پڑھتے ہیں لیکن آج کے ہندوستان میں ہمیں روزگار نہیں مل سکتا۔‘‘ راہل گاندھی نے حاضرین سے سوال کیا کہ یہ صحیح ہے یا غلط؟ عوام نے کہا کہ صحیح ہے۔