جے پور: راجستھان کے سابق وزیر اعلیٰ اشوک گہلوت نے کوٹا کے نیو میڈیکل کالج اسپتال اور بیکانیر کے پی بی ایم اسپتال میں زچگی کے بعد خواتین کی اموات اور گردوں کے متاثر ہونے کے واقعات پر وزیر اعلیٰ بھجن لال شرما کو خط لکھ کر 8 مطالبات پیش کیے ہیں۔ انہوں نے اس معاملے کو سرکاری صحت کے نظام کی ادارہ جاتی ناکامی قرار دیتے ہوئے فوری اقدامات کی اپیل کی ہے۔
اشوک گہلوت نے جمعہ کو لکھے گئے خط میں کہا ہے کہ جن خواتین کی موت ہوئی ہے، ان کے اہل خانہ اور زیر علاج مریضوں کو وزیر اعلیٰ امدادی فنڈ سے فوری مالی امداد فراہم کی جائے۔ انہوں نے ذمہ دار افسران اور ڈاکٹروں کے خلاف مقدمات درج کرنے اور انہیں معطل کرنے کا بھی مطالبہ کیا ہے۔
