’جمہوریت ختم نہیں ہوئی ہے، ہمیں اسے زندہ رکھنا ہے‘، پارٹی ہیڈکوارٹر میں کارکنان سے اکھلیش یادو کا خطاب

سماجوادی پارٹی کے قومی صدر اور یوپی کے سابق وزیر اعلیٰ اکھلیش یادو نے انتخابی عمل کی شفافیت پر سوال اٹھاتے ہوئے مغربی بنگال انتخاب کی کاؤنٹنگ کی سی سی ٹی وی فوٹیج عام کرنے کا مطالبہ کیا ہے۔ انہوں نے الزام عائد کیا کہ ملک میں ’ووٹوں کی گنتی نہیں بلکہ من مانی گنتی‘ ہو رہی ہے۔ ساتھ ہی انہوں نے 2027 کے یوپی اسمبلی انتخاب کو جمہوریت بچانے کی فیصلہ کن جنگ قرار دیتے ہوئے جیت کا دعویٰ بھی کیا۔

اکھلیش یادو نے لکھنؤ میں پارٹی ہیڈکوارٹر پر کارکنان سے خطاب کرتے ہوئے بی جے پی پر انتخابی دھاندلی کے سنگین الزامات عائد کیے۔ انہوں نے کہا ’’جمہوریت ختم نہیں ہوئی ہے، ہمیں اسے زندہ رکھنا ہے۔ 2027 میں عوام اور کارکنان مل کر بڑی جیت حاصل کریں گے۔‘‘ انہوں نے ووٹوں کی گنتی کے عمل پر سوال اٹھاتے ہوئے کہا کہ ’’اس کی سی سی ٹی وی لائیو فوٹیج عام کی جانی چاہیے۔ کہیں ایسا نہ ہو کہ 5 فیصد کا انکشاف باقی 95 فیصد کی حقیقت کھول کر رکھ دے۔‘‘

سابق وزیر اعلیٰ یوپی اکھلیش یادو نے دعویٰ کیا کہ انتخاب میں ’ملٹی لیئر الیکشن مافیا‘ سرگرم ہے اور کندرکی و رام پور کے ضمنی انتخابات میں ’ووٹوں کی ڈکیتی‘ ہوئی ہے۔ انہوں نے اسے بی جے پی کا ’10 نمبری ماڈل‘ قرار دیتے ہوئے الزام عائد کیا کہ اقتدار میں برقرار رہنے کے لیے انتخابی عمل کے ساتھ چھیڑ چھاڑ کی جا رہی ہے۔ مغربی بنگال کے حوالے سے انہوں نے کہا کہ وہاں ’ووٹوں کی شرمناک لوٹ‘ ہوئی اور انتظامی مشینری کا غلط استعمال کیا گیا۔ انہوں نے یہ بھی اعلان کیا کہ وہ جمعرات کو مغربی بنگال جائیں گے اور ٹی ایم سی کی سربراہ ممتا بنرجی سے ملاقات کریں گے۔ اس کے ساتھ ہی انہوں نے واضح کیا کہ انڈیا اتحاد برقرار رہے گا۔

انتخابی حکمت عملی کے حوالے سے اکھلیش یادو نے بتایا کہ سماجوادی پارٹی نے الیکشن کنسلٹنسی کمپنی ’آئی پیک‘ کے ساتھ معاہدہ ختم کر دیا ہے۔ اکھلیش یادو کے مطابق کچھ مہینوں تک انہوں نے ہمارے ساتھ کام کیا، لیکن اب فنڈ کی کمی کی وجہ سے ہم مزید ساتھ کام نہیں کر پا رہے ہیں۔ انہوں نے انتخابی سروے کرنے والے اداروں اور کمپنیوں کو ہدف تنقید بناتے ہوئے کہا کہ کچھ لوگوں نے مشورہ دیا کہ سی-ووٹ ، اے وی ایم اور 360 جیسی کمپنیوں سے جڑیں، لیکن یہ سب بی جے پی کے لیے کام کرتی ہیں۔

اکھلیش یادو نے یہ بھی الزام عائد کیا کہ ’’کچھ انڈر کور افسران ایک خاص نظریے کے تحت کام کر رہے ہیں، جن کا انکشاف کیا جائے گا۔‘‘ اکھلیش یادو کے مطابق 2027 کا انتخاب جمہوریت اور آئین بچانے کی لڑائی ہوگی۔ پی ڈی اے کا ووٹ بینک سب سے زیادہ ہے اور بی جے پی کے پاس اس کا کوئی جواب نہیں ہے۔ انتخاب لڑنے کے سوال پر انہوں نے ہلکے پھلکے انداز میں کہا کہ ’’میں کئی رشی-منیوں اور جیوتشیوں سے ملا ہوں۔ جو پنڈت جی کہیں گے، وہی کریں گے۔ 2012 میں حکومت بنی تھی، 2027 میں پھر بنائیں گے۔‘‘ اس دوران انہوں نے خواتین کے لیے پارٹی کی بنیاد پر ریزرویشن کی وکالت کرتے ہوئے کہا کہ پہلے ذات پات پر مبنی مردم شماری ہونی چاہیے اور اس کی بنیاد پر آبادی کے تناسب سے ریزرویشن نافذ کیا جائے۔