دہلی پہنچتے ہی نتیش کمار نے بنائی جنتا دل یو کی نئی ٹیم، سنجے جھا سمیت کئی سرکردہ لیڈران کو ملی جگہ

نتیش کمار نے جنتا دل یو کی نئی ٹیم تشکیل دے دی ہے۔ اس سلسلے میں جنتا دل یو نے قومی عہدیداران کی فہرست جاری کی ہے، جس میں کئی سرکردہ لیڈران کے نام شامل ہیں۔ سنجے کمار جھا کو پارٹی کا قومی کارگزار صدر منتخب کیا گیا ہے، یعنی وہ اس عہدے پر برقرار رہیں گے۔

بہار میں حکومت کی تبدیلی کے بعد اب جنتا دل یو نے اپنی تنظیم پر مکمل توجہ مرکوز کر دی ہے۔ خاص بات یہ ہے کہ کئی پرانے چہروں کی جگہ اب نئے چہروں کو پارٹی کی قومی عہدیداران کی فہرست میں شامل کیا گیا ہے۔ قومی صدر نتیش کمار اور کارگزار صدر سنجے کمار جھا کے علاوہ پارٹی میں مجموعی طور پر 12 قومی جنرل سکریٹری اور 8 قومی سکریٹری مقرر کیے گئے ہیں۔

جاری فہرست کے مطابق ایک بار پھر جنتا دل یو کے رکن پارلیمنٹ آلوک کمار سمن کو کوسا صدر کی ذمہ داری دی گئی ہے۔ انتہائی پسماندہ طبقہ سے تعلق رکھنے والے چندیشور پرساد چندرونشی کو پارٹی میں قومی نائب صدر کی ذمہ داری سونپی گئی ہے۔ چندیشور پرساد چندرونشی جہان آباد سے رکن پارلیمنٹ رہ چکے ہیں اور نتیش کمار کے انتہائی معتمد مانے جاتے ہیں۔

قومی جنرل سکریٹریز کی فہرست میں دلت برادری سے تعلق رکھنے والے شیام رجک اور اشوک چودھری کو بھی جگہ دی گئی ہے۔ ساتھ ہی کشواہا سماج سے آنے والے لیڈران کو بھی قومی عہدیداران کی فہرست میں شامل کیا گیا ہے۔ رمیش سنگھ کشواہا کے ساتھ ساتھ رام سیوک سنگھ کو قومی جنرل سکریٹری بنایا گیا ہے۔

کشواہا سماج سے تعلق رکھنے والے بھگوان سنگھ کشواہا کو اس بار قومی عہدیداران کی فہرست میں شامل نہیں کیا گیا ہے۔ اسے اس بات کا اشارہ مانا جا رہا ہے کہ ممکن ہے بھگوان سنگھ کشواہا آنے والے دنوں میں ریاستی کابینہ میں شامل کیے جائیں۔ ہرش وردھن کو ایک بار پھر پارٹی کا قومی جنرل سکریٹری بنایا گیا ہے۔ پارٹی کے قومی ترجمان راجیو رنجن پرساد کو قومی سکریٹری کے عہدے کی ذمہ داری بھی دی گئی ہے۔

8 قومی سکریٹریز کی فہرست میں سابق رکن پارلیمنٹ پروین کے علاوہ نتیش کمار کے قریبی تصور کیے جانے والے ایم ایل سی رویندر سنگھ بھی شامل ہیں۔ مجموعی طور پر دیکھا جائے تو جنتا دل یو کے قومی عہدیداران کی اس مختصر ٹیم میں کئی نئے چہروں کو پہلی بار موقع دیا گیا ہے، جبکہ کئی پرانے چہروں کو باہر کا راستہ دکھایا گیا ہے۔ یہ اس بات کا اشارہ ہے کہ جنتا دل یو آنے والے دنوں میں نئے انداز کے ساتھ اپنی تنظیم کو مزید مضبوط اور فعال بنانا چاہتی ہے۔