ابتدائی خبروں میں یہ بھی دعویٰ کیا گیا تھا کہ اس حادثے میں دو پائلٹوں کی موت ہو گئی ہے اور امدادی کارروائیاں جاری ہیں۔ مگر سرکاری وضاحت کے بعد یہ تمام دعوے غلط ثابت ہوئے ہیں۔ حکام نے میڈیا اداروں سے اپیل کی ہے کہ وہ غیر مصدقہ اطلاعات نشر کرنے سے گریز کریں اور ذمہ داری کا مظاہرہ کریں۔
یہ واقعہ ایک ایسے وقت میں سامنے آیا جب حال ہی میں ایک حقیقی فضائی حادثہ پیش آ چکا ہے۔ رواں سال 23 فروری کو جھارکھنڈ کے رانچی کے قریب ایک ایئر ایمبولینس طیارہ حادثے کا شکار ہو گیا تھا، جس میں پائلٹ سمیت سات افراد کی جان چلی گئی تھی۔ اس حادثے میں ایک شدید بیمار مریض، طبی عملہ اور عملے کے دیگر ارکان سوار تھے، اور تمام افراد موقع پر ہی ہلاک ہو گئے تھے۔
