مہر خبررساں ایجنسی کی رپورٹ کے مطابق، ایران اور امریکا و صہیونی حکومت کے درمیان براہ راست جنگ کے ساتویں روز جنگ مزید شدت اختیار کرگئی ہے اور ایران کی جانب سے جوابی کارروائیوں کا دائرہ وسیع ہوتا دکھائی دے رہا ہے۔
تفصیلات کے مطابق سپاہ پاسداران انقلاب اسلامی نے اعلان کیا ہے کہ آپریشن وعدۂ صادق۴ کی تیئیسویں لہر کا آغاز کر دیا گیا ہے۔ اس مرحلے میں میزائل اور ڈرون کے مشترکہ حملوں کے ذریعے مقبوضہ فلسطین میں اہم اہداف کو نشانہ بنایا جا رہا ہے۔
سپاہ کے شعبۂ تعلقات عامہ کے مطابق اس کارروائی کا آغاز مقدس رمز “یا صاحب الزمان عجل اللہ تعالی فرجہ الشریف” کے ساتھ کیا گیا۔ جس میں مقبوضہ فلسطین کے اندر صہیونی حساس مراکز اور خطے میں موجود امریکی فوجی اڈے ہدف بنائے گئے ہیں۔
ایرانی حکام کے مطابق مسلح افواج طویل جنگ کے لیے مکمل طور پر تیار ہیں اور ضرورت پڑنے پر جدید ہتھیار بھی میدان میں لائے جائیں گے۔
امریکی بحری بیڑے ابراہام لنکن پر ایرانی بحریہ کا میزائل حملہ
دریں اثنا ایک علیحدہ کارروائی میں ایرانی بحریہ نے سمندر میں موجود امریکی طیارہ بردار بحری جہاز یو ایس ایس ابرہام لنکن کو نشانہ بنانے کے لیے ساحل سے سمندر میں مار کرنے والا میزائل فائر کرنے کا اعلان کیا ہے۔
